واٹس ایپ نے نیا اہم فیچر متعارف کرا دیا، صارفین کو اب ادا کرنا ہوگا معاوضہ

 

واٹس ایپ نے نیا اہم فیچر متعارف کرا دیا، صارفین کو اب ادا کرنا ہوگا معاوضہ

 دنیا کی مقبول ترین انسٹنٹ میسجنگ ایپ واٹس ایپ نے اپنے صارفین کے لیے ایک اہم فیچر متعارف کرانے کا اعلان کیا ہے، جس کے تحت اب کچھ سہولیات استعمال کرنے کے لیے معاوضہ ادا کرنا ہوگا۔ یہ پہلی بار ہے کہ واٹس ایپ اپنے پلیٹ فارم پر سبسکرپشن ماڈل لا رہا ہے۔

میٹا کی ملکیت اس ایپلی کیشن نے واضح کیا ہے کہ صارفین کی بنیادی چیٹ اسکرین میں کوئی تبدیلی نہیں کی جائے گی، اور روزمرہ پیغام رسانی پہلے کی طرح مفت رہے گی۔ تاہم، نئی تبدیلیاں خاص طور پر چینلز اور سٹیٹس فیچر کے اندر متعارف کرائی جا رہی ہیں۔

چینل مالکان کے لیے سبسکرپشن فیچر

اب واٹس ایپ پر چینل مالکان کو یہ سہولت دی جائے گی کہ وہ اپنے چینلز پر ماہانہ سبسکرپشن فیس مقرر کر سکیں۔ اس فیچر کے ذریعے چینلز کے ممبران مخصوص رقم ادا کر کے تازہ ترین اپ ڈیٹس حاصل کر سکیں گے۔ اس اقدام کا مقصد چینل مالکان کو ایک مستقل آمدنی فراہم کرنا ہے، اور انہیں اپنے مواد کے بدلے معاوضہ حاصل کرنے کا موقع دینا ہے۔

چینلز کی تشہیر کے لیے نئی سہولت

اس کے ساتھ ساتھ، واٹس ایپ نے صارفین کو یہ اختیار بھی دیا ہے کہ وہ چند رقم کے عوض اپنے چینلز کی تشہیر کر سکیں گے۔ اس فیچر سے کاروباری افراد اور مواد تخلیق کرنے والوں کو اپنی رسائی بڑھانے میں مدد ملے گی۔

سٹیٹس فیچر میں اشتہارات کی آمد

دوسری اہم تبدیلی سٹیٹس فیچر سے متعلق ہے، جہاں کمپنی اب اشتہارات متعارف کرانے کا ارادہ رکھتی ہے۔ یہ اشتہارات سوشل میڈیا کی دیگر ایپس کی طرز پر دکھائے جائیں گے اور امکان ہے کہ اس سے میٹا کو بڑی آمدنی حاصل ہو۔

تبدیلیاں کب متعارف ہوں گی؟

کمپنی کے مطابق یہ تمام نئے فیچرز آئندہ چند ماہ میں دنیا بھر میں بتدریج متعارف کرائے جائیں گے۔ واٹس ایپ کی اس نئی حکمت عملی کا مقصد ایک پائیدار تجارتی ماڈل تشکیل دینا ہے، جہاں ایپ نہ صرف مفت سہولت فراہم کرے بلکہ خصوصی فیچرز کے ذریعے آمدنی بھی حاصل کر سکے۔

صارفین کی رائے اہم ہوگی

یہ دیکھنا دلچسپ ہوگا کہ واٹس ایپ کے ڈیڑھ ارب سے زائد صارفین ان تبدیلیوں پر کیا ردعمل ظاہر کرتے ہیں۔ کیا لوگ سبسکرپشن فیس ادا کریں گے یا مفت متبادل تلاش کریں گے؟ وقت ہی اس کا جواب دے گا۔